Tanuhui Mangkalupen

Mangkalupen Salamat kamalem kawan umpu mawinei... manuwu nelang segah......inun kabar naun katuluh......?😁 Ewwww.....cungu nini lawah ang tanuhui andri kawan umpu, ngalelu ngakasan, ngakepuk ngampandre kawan umpu katuluh... 😂 Hayu’ uh kia mayati takam siawet tanuhui malem yena....😉 Malem yina nini tanuhui hi “Mangkalupen Nampaleng Using Hang Rapuan” Eh....hi nini na la tanuhui kesah haut rasa kami gaha wuah tanuhui haut, Amaka malu gereku, nini kasungu ngesah hi mangkalupen m kawan umpu nampan ngampi itung takam😃 Jaman hanteru naan erang kaulun upu bangaran hi Mangkalupen, upu taruna wau mamai bujang. Itung sa turunan maanyan na, gagah segah, manuwuen nelang sadang😍 Hi mangkalupen na muneng baya inehni sa haut nadap matueh. Itung matueh haut rama panyakit eaw mahanang pingang, mahanang ulu, takanan mamai, tenga ang bangat rigas lagi😁 Biar haut mahi himat kauleen, sika sa tatap kaule werek wesu munyak. Apalagi sa hi mangkalupen na memang patut na kunyak tarus gawian, biar sa gagah bagawi murah nuu dami na huyu daya ulun matueh,sa huyuan ulun jarang sa patut beres urusanni. Himat sa maka sasangit eleh, itung ulun ru mambaran budas😏 Nuu nahuyu kude ang himat hakun makai akal bafikir sika puang himat iyuh pakai Mun eaw ulun ru marahati kude puang pintar...kayiru kira-kira kawan umpu😁 Naan andrau.....ineh mangkalupen na ganyah puang hampe jaraga tenga, bu puang himat pas iwei ru. Ekat marauh ngakulu pinang manta nelang nadap tapinangan. Nerau hanye hi mangkalupen. “Uuuuu.... Kalupen....inun luen tareh kaayat yena?” “luen pusuk katu baya kulat tarisip....” jawab mangkalupen😁 “ mahi sa maka panawu?”tunti inehni. Kutik hindra hi mangkalupen nadap inehni. “Hulu hanyu nampaleng eha satua jari panawu luen, ang ku kajujul sa luen kulat tarisip eleh” eaw inehni “ kude ada kajut lawit teka lewu” eaw inehni bu bainsut ma babalaian, iburungkus☺ Tulak hi mangkalupen ma sungking, lepuh ngalap lanyung baya tampalengan, sambil bafikir..maawe aku na nampaleng satua, ada lawit teka lewu. Bu tunupni using balang telu ganyah miekut hang rapuan baya walenun..😁 Uuuuuuhhh....kunu mangkalupen iti hanye eha sa iyuh tampaleng tau jari panawu puang ngakali lawit teka lewu. Bagamat hanye nyandripi using ganyah siruru, bu tampalengni hang diung using, jujut hindra udi hie. Ha bujur kawan umpu....puang bangat maeaw using mandre ru numa punah hulet lela daya mangkalupen. Nganue inehni mandre wansit hanye nulu using ru bu mapahakni baya teung rehe😅 “ineh..ineh..amuan ati luen panawu mahanyu” hi mangkalupen ngele inehni. Puhut pihe inehni amuan, bu namui luen baya nahi... “inun kapanawu yina mangkalupen, wau ku kainam la marare-rare nanam satua...?” Eaw inehni nelang kiul-kiul mapa lunek using. “yiri tampalengku using hang rapuan...” eaw mangkalupen. Pawuras budas tepus inehni nahi teka wawa😂😂😂 “hiyalat....yiri kalupen....inun sa ulah itampaleng using hang rapuan...yiru eha paliharaan puang pakai jari panguta. Amun nampaleng ru aru hang wuang lasi....tampaleng palanuk antawa parang...”eaw inehni, nelang maleleng maleat iraraat😁 Ha, wansit tulak mangkalupen mawuang lasi, lepuh nuat tampaleng😋 Ma keuni ni baya andrau kaiyat, tulak hanye naua tampalengan. Dasar bujur kawan umpu...ganyah ipetek ipundran,erang kaukui palanuk napu nelang munuk😃 Kaawe akal kunu ni sa nginsing palanuk dedeh nelang gagah ipetek ri.... Bansa erang pananak nahi hanye ekat mansungur nadap palanuk hang tampalengan, udi hie babungkat hanye ngutik rawen asem. bu hurukni hang pungung palanuk😚 “ uuuu....ganuk....hulu hanyu mudi malewu badahulu, lempat laju-laju...nampan hi ineh wansit mapahak hanyu.” Bu sanepahni, palanuk ru. Ewwww...nyalah nakatek lempat palanuk nadap jumpun, wawai ang dinung. Yiru maka rimut mangkalupen, nawat rahati tenga ni. Dami hampe kunu ni himat langsung nyuap nahi baya taritisan naaa die...😋 Mudi hanye nelang ngakuyuku..... “uuuuu....ineh.....haut madru sa papahakan palanuk nien?” “palanuk sa inun?” eaw inehni nelang miuk nadap wanawang “Palanuk iyuhku nampaleng nien, haut huyuku hanye mudi badahulu...nampan wansit hanyu nuen...inun sa rigas ni ipetek, himat sa wansit lempatni nuju lewu...” jawab mangkalupen. “heeh aku....kalupeeeen.....! amun palanuk iyuh nampaleng ru masih welum, napangkung antunu ni...”eaw inehni nelang ane kaluar dikimate, nadap hi mangkalupen